النايب راجي السعد عمل عشا تكريمي للسيناتور الأميركي ليندسي غراهام والمبعوثة الأميركية مورغان أرتاغوس ببيروت. وقامت القيامة كيف قالت مورغان أنو راجي السعد عندو كل المواصفات الرئاسية. يعني منيح يللي كلام المسؤولة الأميركية إجا ببداية عهد الرئيس جوزف عون ومش بختامو حتى ما كتار يفسروه بأنو الأميركان قرروا يجيبوا راجي السعد رئيس.
يا جماعة القصة ما بدا هلقد. راجي السعد عمل مقدمة ترحيبية بأرتاغوس وردت هيي بلياقة وحكيت عن مواصفات هالنايب الشب. والله العظيم ما في انتخابات رئاسية بكرا ولا السنة الجايي ولا يللي بعدها. الانتخابات الرئاسية رح تصير بالـ2031 يعني طوّلوا بالكن ىبلا هالكرايز يللي تابعناها. تاني شي هل حدا بيقدر ينكر انو النايب راجي السعد العضو النشيط بلجنة المال والموازنة وعضو لجنة البيئة ويللي قدر يثبت حالو بجهدو بالعمل باللجان بعيدا عن الشعبوية انو عندو مواصفات ممتازة وماروني 24 قيراط؟
الأهم انو تركزوا يا شباب على مواقف غراهام وأرتاغوس بالعشا وبكل المحطات بزياتهم للبنان مع توم برّاك لأن هون الأساس يللي بيبقى بأنو ما في اي خلاص او تطور بالبلد او نهوض اذا ما تم اولا نزع سلاح حزب الله ومن دون شروط مسبقة. فهمتو او منعيد؟
